(Deep Work) هونەری تەرکیزکردن لە جیهانێکی پڕ لە سەرنج‌لادان

کاتێک تەرکیز دەبێتە هێز

لە جیهانی ئەمڕۆدا، زۆرجار وا هەست دەکەین کە کێشەکەمان کەمبوونی کاتە، بەڵام ئەم کتێبە وای لێم کرد بیر لە پرسیارێکی گرنگتر بکەمەوە:

ئایا بەڕاستی کاتمان کەمە، یان سەرنجمـان زۆر دابەش کردووە؟

Deep Work چییە؟

(Newport) لە کتێبەکەیدا Deep Work بەو توانایە دەزانێت کە مرۆڤ بتوانێت بە تەرکیزی تەواو و بەبێ سەرنج‌لادان، لەسەر کارێکی مێشکی و گرنگ کار بکات. ئەم جۆرە کارە جیاوازە لە کارە سەرپێییەکان؛ چونکە پێویستی بە هەوڵی فکری، تەرکیز و توانای چارەسەرکردنی کێشە هەیە.

بۆ نموونە، خوێندنەوەی بابەتێکی قورس، نووسینی توێژینەوە، فێربوونی توانایەکی نوێ یان کارکردن لەسەر کێشەیەکی ئاڵۆز، دەتوانێت نموونەیەک بێت لە Deep Work.

کات بە تەنیا بەس نییە

یەکێک لەو بیرۆکە گرنگانەی کتێبەکە بۆ من ئەوەیە کە زۆر کارکردن هەمیشە بە مانای بەرهەمداربوون نییە. لەوانەیە کەسێک چەندین کاتژمێر سەرقاڵ بێت، بەڵام سەرنجی بەردەوام پەرت بێت. لە بەرامبەردا، کەسێکی تر دەتوانێت لە ماوەیەکی کەمتر، بە تەرکیزێکی قووڵ، ئەنجامێکی باشتر بەدەست بهێنێت.

لەبەر ئەوە، پرسیارەکە تەنها ئەوە نییە:

«چەند کات کارم کرد؟»

بەڵکو:

«لەو کاتەدا چەندە بە تەواوی تەرکیزم لەسەر کارەکەم بوو؟»

سەرنج‌لادان و سۆشیال میدیا

بەشێکی گرنگی کتێبەکە پەیوەندی بە شێوازی بەکارهێنانی تەکنەلۆجیا و سۆشیال میدیا هەیە. مۆبایل، Notification، پەیام و سۆشیال میدیا بەشێک بوون لە ژیانی ڕۆژانەمان، بەڵام کێشە لەوەدا دروست دەبێت کە ئەمانە ببنە هۆی دابەشبوونی بەردەوامی سەرنج.

(بۆیە پەیامی کتێبەکە بۆ من ئەوەیە کە پێویستە تەنها کاتمان بەڕێوە نەبەین؛ بەڵکو سەرنجمـانیش بەڕێوە ببەین).

فێربوون بە بێزاربوون

بابەتێکی سەرنجڕاکێشی تر لە کتێبەکە (Embrace Boredom) .

واتە پێویستە مێشکمان فێر بکەین کە هەر کاتێک بێزار بووین، دەستمان بۆ مۆبایل نەبەین. چونکە تەرکیزکردن توانایەکە و وەک هەر توانایەکی تر، بە ڕاهێنان بەهێز دەبێت.

کاری قووڵ و کاری سەرپێیی

Newport جیاوازییەکی گرنگ لەنێوان Deep Work و Shallow Work دادەنێت.

Deep Work:

کارێک کە پێویستی بە تەرکیزی فکری و هەوڵی قووڵ هەیە و بە شێوەیەکی ڕاستەوخۆ بە بەرهەمهێنان و فێربوونەوە پەیوەندیدارە.

Shallow Work:

کارەکانێک کە زۆرجار کاتمان پڕ دەکەن، بەڵام پێویستییەکی کەمتر بە تەرکیزی قووڵ هەیە.

ئەم جیاوازییە وای لێم کرد زیاتر بیر لەوە بکەمەوە کە هەموو کارێک بە یەک ئاست گرنگ نییە.

کۆتایی تێڕوانینی من

دوای خوێندنەوەی Deep Work، بۆ من تەرکیز تەنها شێوازێک بۆ تەواوکردنی کار نییە؛ بەڵکو توانایەکی سەرەکییە بۆ پاراستنی کات، وزە و توانای فکری مرۆڤ.

لە جیهانێکدا کە هەموو ڕۆژێک شتێک هەوڵ دەدات سەرنجمان لاببات، توانای ئەوەی بڵێین:

«ئێستا تەنها لەسەر ئەم کارە تەرکیز دەکەم.»

لەوانەیە یەکێک بێت لە گرنگترین تواناکانی سەردەمی ئێستا.

دەستەواژەکان :

Work Deeply (بە قووڵی کارکردن)

Embrace Boredom (پەسەندکردنی بێزاربوون و ڕاهێنانی مێشک بۆ تەرکیز)

Quit Social Media (کەمکردنەوە یان وازهێنان لە سۆشیال میدیا)

Drain the Shallows (کەمکردنەوەی کارە سەرپێیی و بێ‌گرنگەکان)

سەرچاوە:

Newport, C. (2016). Deep Work: Rules for Focused Success in a Distracted World. Grand Central Publishing.