ئاکرێ: پایتەختێ نەوروزێ
ل ئسپێدەیەکا نوی و ل باژەرێ ئاکرێ، بلبل مژیلی خاندنا ئاوازێن خونە و چیا ب بەژنا خۆ یا بلند باژەرێ من دخەملینن و تازە خەلک یێ ژ خەوێ رادبن، و هەر کەسەک دکەفتە سەر کارێ خۆ. ئازادیش کورەکێ ڤی باژەری یە، کارێ بەرگدوریێ دکەت. ل وێ ئسپێدێ ئازاد و هەڤالێن خۆ ل گروپێ کەلێ مژیلی درینا ئاڵایێ ١٠٠ مەتری نە بۆ روژا بەری ئاگری.
ئاڵا ل رێکەفتی ٢٠ی ئادارێ حازر بوو، و گەنجێن خوین گەرم ل گەرەکا چوستەیا ب دوهل و زرنا و کەیف و سەما ڤە، بوست ب بوست ئالا لسەر ملێن خۆ دانا و ل گەرەکێن کەڤنار را بەرەڤ کەلها ئاکرێ بر.
ئاڵا، لسەر کەلها ئاکرێ راخست، و گەنج ل کەلهێ هاتنە خوار. ل ئێڤارا هەمان روژێ خەتیرێن ئاگری ئامادەکرن و بەرەف حەوشا (بەنا دێرێ) ئینان و دیسان ب دوهل و زورنا و داوەتێ ل (بەنا دێرێ) وزە و ورەیا گەنجێن خوین گەرمێن ئاکرێ بلندتر لێ کر.
ل گەل ئاڤابوونا روژێ، پشتی بانگێ مەغرەب، هەموو گەنجان پێکڤە و ب گەرم و گوڕی خەتیرێن خۆ ب ئاگری رون کرن و پێنگاڤ پێنگاڤ ل سەر چیای کەفتن و دیمەنەکێ جوان دا باژەری. و ل دیف دا ب یاریێن ئاگرین ئاسمان رەنگین کر و هونەرمەندا ب دەنگێن خۆ یێن زەلال ئسترانێن نەوروز و کوردبوونێ گوتن.
